A irrupción do coche eléctrico parece -agora si- imparable e a industria viguesa do motor quere seguir en vangarda tras a profunda transformación que se aveciña. Para conseguilo, innovar sobre as baterías de ión-litio que alimentan este tipo de vehículos resultará vital. É por iso que o Centro Tecnolóxico de Automoción de Galicia (CTAG), o cerebro do sector, está a construír un novo laboratorio de ensaios para baterías no que se investirán máis de 2 millóns de euros, segundo puido saber este xornal. O lanzamento de ata catro modelos 100% eléctricos en Balaídos nos próximos dous anos e os cambios normativos para impulsar a descarbonización do parque móbil en Europa aceleraron este proxecto.
As obras desta "ampliación das capacidades de ensaio" vinculadas ás baterías de ión-litio que utilizan os coches eléctricos e híbridos comezaron hai uns meses, de forma que parte do novo edificio xa é visible. O investimento nesta infraestrutura, que deberá estar lista o próximo ano, é de algo máis de 2 millóns de euros, segundo os presupostos do padroado da Fundación CTAG. Nesta infraestrutura, os técnicos do centro poderán levar a cabo todo tipo probas sobre as células de ión-litio e doutros materiais que se utilizan para a elaboración das baterías, así como dos sistemas de motopropulsión, aproveitamento da enerxía do vehículo, etc. Estará dotado das últimas tecnoloxías e medidas de seguridade, polos riscos que afectan ao coche eléctrico, como son os incendios.
O CTAG conta na actualidade con nove laboratorios (acústica e vibracións, ensaios ambientais, seguridade pasiva, materiais, motor, fiabilidade, materiais; electricidade, automatización e instrumentación, e metroloxía), pero ningún específico sobre baterías, aínda que o centro participou e participa en múltiples proxectos vinculados ao coche eléctrico, varios transfronteirizos. Nos últimos anos, o CTAG centrara o seu esforzo innovador na electrónica asociada ao coche conectado e á condución automatizada (o seu papel foi clave en que Vigo fose a primeira cidade española pola que circulase un vehículo autónomo, a finais de 2015) , así como aos novos procesos vinculados á fábrica 4.0, pero o xiro das administracións cara ao coche eléctrico obrigou ao sector -e ao CTAG- a reorientar as súas prioridades.
Unha proba palpable de como os cambios normativos que se están a introducir para desterrar a descarbonización do mercado automobilístico nun horizonte non tan afastado son os catro modelos 100% eléctricos que PSA lanzará en Vigo nos próximos dous anos: as versións eléctricas dos Berlingo, Partner-Rifter e Cambo (proxecto K9) e o todocamiño V20, do que xa se están a montar algunhas unidades. A planta tamén acolle o único taller de montaxe de baterías da multinacional francesa, que subministrará os módulos de ión-litio a todo o dispositivo industrial do Grupo PSA en Europa, cuxa actividade podería verse beneficiada agora polo laboratorio do CTAG.
(Fonte: Faro de Vigo)
